Matayog na Pangarap

Matayog na pangarap nagdala sa ibabaw

Panaginip na akala'y 'di makakamit kailanman

Napasakamay nang lahat at nahawakan

Lahat sa mata'y naging makatotohanan

Matayog na pangarap

Naging gabay sa pagsusumikap

Ginawa ang lahat upang maka angat

Makalaya sa buhay na mahirap

Maraming pagsubok ang naganap

Hindi natinag 'di nagpaawat

Paakyat ang hakbang kaya mabigat

Huling hakbang sa tuktok rin itinapak

Mahirap ang makipagsapalaran

Hindi birong pagkatao ay matapakan

Napagtagumpayan at nalampasan

Hindi na kailangan muli mangibang bansa

Hindi na problema ang pera

Hindi pansin pala'y nasusunog na

Yaman lahat ay naririto na

Hindi nalamang paubos na pala

Hindi nagawang ingatan

Nasilaw sa mga bawat kinang

Nasayang mga pinagkahirapan

Butong tinanim, punong nakakalbo na

Nasanay sa minsang naging buhay

Hinahanap naglahong karangyaan

Nagsisisi sa mga naging hakbang

Sana pala ay dinahan-dahan

Balik sa normal ang buhay

Tulad ng dati kakain gamit ang kamay

May kutsara namang naghihintay lamang

Nais lang balikan ang dating nakasanayan

Naubos lahat ng kayamanan

Naisangla muli mga ari-arian

Pagiging hirap at mahirap

Estado ng buhay na binalikan

Matayog na pangarap

Minsang nagdala sa kataas-taasan

Matayog na pangarap

Minsang nahawakan, di pansing nabitawan

Matayog na pangarap

Dala kong muli sa itatakbo pa ng buhay

Matayog na pangarap

Aral na dala sa muli kong paglipad