Pahulay Sa Adlaw

credits: apple caballero

Ilang araw na ba noong huli kaming magkasama ng malaya sa mga mapanirang mata't dila. Gusto ko na siyang hagkan. Gusto ko na ngang tumakbo papalapit sa kaniyang kinauupuan, gusto ko nang gulatin siya sa pagkiliti sa kaniyang tagiliran, o 'di kaya'y yakapin siya agad ng mahigpit tulad ng matagal ko ng hindi nagawa. Hinahangin pa nga ang buhok niya na parang paguudyok 'yon ng hangin sa akin para magnakaw ako ng halik sa pisngi niya.

Mendiola

credits: palisinwonderland

Sabi ni sir Ricky Lee-hindi mo pwedeng mahalin ang isang tao nang hindi mo minamahal ang kaniyang paniniwala. Minahal ko naman ang hilaga, silangan, timog, at kanluran ng mga paniniwala ni Minda pero hindi pa rin siya naniwalang may magandang patutunguhan ang samahan namin.

Ang magagawa ko na lang ngayon ay titigan siya. Pinipilit kong hindi mag auto focus sa dibdib niya pero kapansin pansin ang ginto niyang kuwintas na hindi naman naka sabit noon sa leeg niya. Marahil ay galing yon sa kung sino man ang kasintahan niya ngayon.

Last Trip

credits: hezrei escabel

Alam ko namang madali siyang makakahanap. Hindi naman kasi siya mahirap mahalin. Pagmamahal, madali niya 'yong naituro sa natutulog kong kaluluwa. Alam ko. hindi lang ako naging handa sa pagdating niya.

Alam ko ring hindi puyat ang nagpapahapdi sa aking mga mata sa mga sandaling iyon. Gusto ko siyang yakapin upang hindi maampyasan pa ng bumubuhos na ulan, kung ako lang sana ang kasukob niya sa payong na iyon.