Sa Tatlong Araw ng Taon

Tulad ng sabi nila, sa huli, sa iisang lugar din tayo magkikita. Hindi 'yon sa langit, kun'di sa sakayan ng jeep. Nakakatuwang isipin, katapat lang mismo ng sakayan na 'yon ang kolehiyo kung saan kita nakilala, taon nang kaligayahang mararamdaman mo't tila nabalikan na rin sa pagtanaw lamang.

Parang bawat paglingon ko sa'yo tuwing naroon tayo matapos ang kaniya-kaniyang trabaho. Kailangang palihim pa ngunit sulit ang bawat pagsulyap ko sa'yo. Kahit saglit lang, naroon pa rin ang bulong nagsasabing ikaw na nga, ikaw na nga ang siyang mamahalin ko ng panghabang-buhay. Sulit ang bawat pagtingin, tulad rin ng tatlong araw na nagpaligaya sa akin, ang pinakamasasayang araw ko sa aking buhay bago pa biglang magbago ang isip mo't sa mismong sakayan na iyon, palihim na ibinalik mo't nilagay sa aking bulsa ang singsing.